Xabi Igoa, Manex Agirre, Paula Amilburu, Aitor Ugarte, Danel Herrarte, Martin Abarrategi eta Peru Abarrategi izango dira Aramaioko ordezkariak 2024ko Arabako Bertsolari Txapelketan. Azken hori da, hain zuzen egungo txapelduna, 2022an irabazi ostean.
Baranbioko Garrastatxu Txokoan aurkeztu dute txapelketa eta, Arabako Bertsozale Elkarteak adierazi duenez, urtarrilaren 28an hasi eta martxoaren 16an bukatuko da. Egun horretan, Gasteizko Printzipal Antzokian egingo dute final handia. Aurrez, final-laurdenak Izarran, Oionen eta Laudion jokatuko dituzte eta, finalerdiak, Aramaion eta Dulantzin.
Parte-hartzaileei dagokienez, hemezortzi bertsolari ariko dira lehian, 2022ko Arabako Bertsolari Txapelketaren finalean kantatu eta izena eman duten bost finalistak eta 2023ko udazkeneko kanporaketetan puntuazioaren arabera sailkatutako lehenengo hamahiruak. Hala, hemezortzi arituko dira final-laurdenetan, hamabi finalerdietan eta sei, finalean. Bertsolari bakoitzak behin baino ez du kantatuko fase bakoitzean.
Txapelketan Arabako bederatzi epaile arituko dira. Halaber, hamahiru gai-jartzailek taldean gaiak sortuko dituzte eta haietako sei izango dira saioak eta finala aurkeztuko dutenak.
