Santa Kruz apaizaren ihesaldiaren urteurrena izango dute gogoan gaurtik aurrera Aramaion

Aramaioko kartzelatik modu harrigarrian ihes egin eta Izpizte inguruko koba batean gordeta egon zen Manuel Santa Kruz apaiza 1872an. Hain zuzen, 150 urte bete dira aurtengo abuztuan gertakari hartatik. Aramaioko Udalak gertakaria gogora ekarri eta Santa Kruz apaizaren figura ulertzeko erakusketa zabalduko du Sastiñan.

Manuel Arroyo bildumazale hernialdearra ibili da erakusketa prestatzeko lanetan. Garaiko arropak eta materiala jarri dituzte ikusgai hilaren 20ra arte zabalik egongo den erakusketan.

Hitzaldia gaur, 18:30ean

Patxi Salaberri aramaioarrak hitzaldia egingo du gaur, Sastiñan, 18:30ean. "Santa Kruz apaizaren inguruko hiruzpalau anekdota ezagutzen ditugu, baina nik nahi dudana da jendeak ulertzea zertan ibili zen eta zer motibazio izan zituen", dio Salaberrik.

Manuel Ignazio Santa Kruz 1842an jaio zen, Elduainen. Oso gazte geratu zen umezurtz, eta, ondorioz, osaba batekin hazi zen eta apaiztu egin zen. 1866an, Hernialdera bidali zuten apaiz lanetara. Handik gutxira, karlismoaren inguruko propaganda aktiboa egiten hasi zen eta arrazoi hori tarteko atxilotu egin zuten 1870ean. Orduko hartan ere ihes egin eta Ipar Euskal Herrira joan zen. Bigarren Karlistaldian Aramaion atxilotu zuten, 1872an, eta fusilatu behar zuten bezperan egin zuen ihes. Santa Kruz apaizaren egiteko moduez jardun du Salaberrik: "Nolako kontrasteak zituen, ez bakarrik karlisten etsaiekin, baita karlismoaren buruzagi militarrekin. Testuingurua ulertzea nahiko nuke, ez bakarrik irudia".

Dokumentala domekan

Ihesaldiaren 150. urteurrenaren, inguruan beste ekitaldi bat ere antolatu du Udalak. Domekan,kultura etxean, Apaiz gartzela ikus-entzunezkoa emango dute, 19:00etan.

Erakusketa: ordutegia

Sastiñako erakusketa hilaren 20ra arte egongo da ikusgai.

  • Irailaren 15ean, eguena: 18:30etik 20:30era.
  • Irailaren 17an, zapatua: 12:00etatik 14:00etara.
  • Irailaren 18an, domeka: 12:00etatik 14:00etara.
  • Irailaren 19an, astelehena: 18:00etatik 19:30era.
  • Irailaren 20an, martitzena: 18:00etatik 19:30era.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.