Hala, 255.330,27 euro txertatuko dira 2022ko aurrekontura. Helburua da "diru hori erabilgarri izatea" hainbat proiektu aurrera eramateko. Lierni Altuna alkateak zerrendatu zituen esku artean dituzten proiektuak: Bizente Goikoetxearen estatua berritzea; kultura etxeko aretoan hobekuntzak egitea, argiteriari eta soinuari dagokionez; Santa Ana ermitan harria ateratzea; auzoetan buzoi komunitarioak jartzea –Eguzkierripan eta Gantzagan jarriko dira proba moduan–; farol berriak jartzea Zalgon eta plaza ondoan; asfaltoa botatzea hainbat bidetan; maskulinitate tailerraren hirugarren saioa egitea –hala eskatu dute parte hartu dutenek–; D2030 ekimenean parte hartzea, herriko energia aukeren azterketa egiteko; gazte txokoa, nerabeen aisialdirako talde bat sortu da, baina espazio baten beharra ere badute; Iturrizuriko ur arazoak konpontzea; Correoseko bulego barik geratu denez herria, paketeak jasotzeko posta-kutxa bat jartzea; eta anbulatorioko arrapala handitzea, irisgarri egin eta esku-ohe bat sartzeko aukera emateko. Iazko aurrekontuko soberakinetik hartuko da diru kopuru hori –gehiago geratzen da soberakinean–. "Hau da lehenengo proposamena, eta ondoren irailean ere egin daiteke beste bat", gehitu zuen alkateak.
Horrez gain, kiroldegiko obraren espedienteko agirien aldaketa egin eta lehiaketa berriz hastea onartu zuten.
Euskadi Lagunkoia
Euskadi Lagunkoia ekimenera atxikitzea onartu zuen udalbatzak, aho batez. Martxo amaieran, Euskadi Lagunkoia zer den azaltzen egon zen ekimeneko kide Ainara Tomasena; bada, zortzi laguneko talde eragilea sortu dute Aramaion, ekimenarekin aurrera egin nahi dutenek. "EAE mailan, 70 herri daude atxikituta ekimenera", azaldu zuen Cristina Etxenausia zinegotziak. Ekimenaren helburua da herritarren parte-hartzea bultzatzea, herriak eta auzoak hobetzen joateko. Adineko pertsonekiko hiri lagunkoia sortu eta zahartze aktiboa sustatzea da asmoa. Behin talde eragilea sortuta, Udala bidelagun izango dute proiektuan zehar.
2023ko jai egun ofiziala
2023ko azaroaren 11, San Martin eguna, zapatua izango da. Hori horrela, udalbatzak erabaki du jai egun ofiziala uztailaren 3a izatea, astelehena.
