608 puntu eskuratu ditu sei finalistetan gazteena izan den bertsolari txapeldunak, eta harekin buruz burukoan aritu den beteranoak, Manex Agirrek, 602 puntu lortu ditu.
Oihane Perea sailkatu da hirugarren, 413,5 punturekin –bere azken txapelketa dela jakinarazi du bukaerako agurrean–. Iñaki Viñaspre izan da laugarrena, 410,5 punturekin, eta ondoren sailkatu dira beste bi aramaioarrak. Xabi Igoak bosgarren egin du, 402 lortuta, eta Paula Amilburu sailkatu da seigarren, 384 punturekin.
Arabako lehen bertso eskolen sortzaile Serapio Lopez Ortuetak jantzi dio txapela Peru Abarrategiri, eta honakoa bota du agurreko bertsoan: Eskakizun txikitxo bat/aterako dut plazara/nahiz Aramaio ta Oion/ez den berdin beharbada/Probintzi txiki honek du/ bere-berea euskara/batzuek ahaztu arren/gu ere euskaldun gara/Beraz konplexu guztiak/doazela pikutara/ama berdinak erditu baditu zazpi alaba/merezi duen moduan/zaindu ezazue Araba.
