Manex Agirrek jarri dizkio berbak Araba Euskarazen kantuari

Argantzun Ikastolak dihardu antolatzen 2022ko Araba Euskaraz eta ekainaren 19an ospatuko dute hori Trebiñun. Hori girotuko duen abestia Zortzi alaba dantzari da; horren letrak Manex Agirre bertsolari aramaioarrak idatzi ditu eta Sukasuan eta Dupla taldeek jarri diote musika.

Elkarlanean eta auzolanean egindako kanta dela adierazi dute antolatzaileek: "Elkarlana eta auzolana baitira gure jaia antolatzeko ardatz". Izan ere, Arabako zortzi ikastolak elkarrekin dabiltza egun hori eta horren bueltakoak gertatzen. Abesti alaia eta doinu dantzagarriak dituena sortu dute, eta izenburuak lotura zuzena du aurtengo leloarekin: Zortzigarren alaba. Trebiñu da Arabako zortzigarren kuadrilla eta Argantzun Ikastola, Arabako zortzigarren ikastola.

2003an sortutako ikastola

Euskararen erabilera sustatzea eta erabilera eremuak zabaltzea da beste behin Araba Euskarazen helburua antolatzaileek adierazi dutenez; baita Trebiñu "Araba dela eta euskararen herria" dela aldarrikatzea ere. Era berean, Argantzun Ikastola ezagutzera emango dute, eta ikastolaren eraikin berria egiteko dirua lortu; 2023-2024 ikasturtean zabaldu gura dute hori.

Argantzun Ikastola 2003an sortu zuten haurrek euskaraz ikas zezaten gura zuten gurasoen eskaerari erantzunez; ordura arte haur gehienak Gasteizera joaten ziren. Gaur egun 67 ikasle ditu ikastolak. Araba Euskaraz laugarrenez ospatuko dute Argantzunen; euskara ardatz duen jai hori 2001ean, 2007an eta 2018an ere han egin zen.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.