"Bi hilabete osorik pasa ditugu alarma, krisi, eta konfinamendu egoeran; aurrez ez dugu horrelakorik ezagutu. Hirugarren adinean gaudela eta, gaixotasun honen aurrean oso ahulak garela sinetsarazi digute", dio, hasteko, Alaiak jubilatuen elkartetik helarazitako oharrak. "Hala ere, jada hasiera eman diogu etxealdia leundu eta normaltasunerako itzulbideari".
Alaiak elkartekoek hainbat ekintza zituzten aste hauetarako, "guztiak garai hobearen zain": elkartearen eta Arabako jubilatuen elkartearen batzarrak ziren egitekoak; ortuari buruzko hitzaldia ere bai; karta-joko txapelketak; eguneko irteerak; La ruta del Quijote irteera –ez dute aurten egingo–; ekainaren 20an Aramaion egitekoa zen Arabako jubilatuen topaketa –hau ere ez dute aurten egingo–; kantu tailerra; podologia zerbitzua...
Euskara hobetzeko ikastaroarekin, berriz, jarraitzen dute, aurrez aurrekorik gabe eta teknologiaren bidez bada ere. Ostantzean, "pazientziaz" itxaroteko deia egin dute elkartetik.
