Euskal Herriko Kluben Arteko Txapelketaren finalerako –Orozkorekin– sailkatu da asteburuan Julen Olaizola, Zeanuriko Danel Beitiari, euren frontoian, 9-22 irabazita. Bi zati izan zituen partiduak. Aramaioarraren pilotarekin jokatu zuten aurrenekoa; pilota bizia zen: "Biok gara indartsuak, eta oso parekatua joan zen lehia; asko ibiltzea eskatzen zuen pilota hark", zioen Olaizolak.
8-10 zihoazen, luzea eta gogorra zihoan partidua; biek nabari zuten nekea, etxekoak gehiago. Pilota aldatu zuen Beitiak, berea atera zuen, aurrekoa baino motelagoa: "Jokoan arriskatzea erabaki zuen, baina bera ez da aurrelari petoa, eta niri etorri zitzaidan hobeto pilota hura".
Olaizolak mendean hartu zuen kontrarioa; dena atera zitzaion aurrean, eta txoratzen zegoen amaieran: "Ez daukat hitzik".
Hiru aste barruko finalerako eskuak berreskuratzea izango da orain inportanteena: "Esku biak apurtuta amaitu dut"; Zizurreko txapelketan ere hasiko da, dena den, asteburu honetan.