Eusko Jaurlaritzaren ingurumen kudeaketarako Ihobe sozietate publikoak, besteak beste, antolatuta, Klima Aldaketaren Astea egingo da lehenengoz erkidegoan, eta egitarauaren barruan bi saio izango dira Aramaion: astelehenean, hilak 4, basogintzari buruz jardungo dute Errez kooperatibako Markel Arriolabengoak eta Iñaki Etxebestek, 18:30ean, kultura etxean; ordu berean, eguaztenean, udaletxean, eztabaida irekia izango da klima aldaketaren ikerketarako BC3 euskal zentroko Unai Pascualekin.
Asteklimaren eta Aramaion egingo diren ekintzen helburua da klima aldaketak dakartzan arazoen gainean gizartea sentsibilizatzea eta haiei aurre egiteko jendea konpromiso pertsonala hartzera bideratzea, "ekintza oro, txikia izanik ere, baliagarria delako". Asteklima barruan ia ehun ekintza egingo dira 50 herri ingurutan.