Urte hasieran onartu zuen Udalak Hondakinen Kudeaketa Hobetzeko Plana, eta, horren baitan, hainbat ekimen abiarazi ditu. Lehenik, etxeko konposta egiteko materiala banatu du. Maiatzean, auzo guztietan izan ziren bileretan etxez etxeko konposta sustatzeko kanpaina abiatu zuen, eta formakuntza eta materiala eskaini. 80 bat etxek eskatu zuten materiala eta lau formakuntza eman dituzte –Oleta falta da hori jasotzeko–.
Hala, konpostagailua, aireztatzailea, kubo txikia eta etxekonpost gidaliburua banatuko dituzte, eskaeren arabera. Kanpaina horren beste helburuetako bat izan da konposta etxean egiten dutenen datu basea osatzen hastea.
Plastikoa murrizteko, poltsak
Bestalde, Murriztu dezagun plastikoa, erabili zure poltsa eta tuperra kanpaina ere jarri du martxan Udalak. Komertzio eta saltokietan oihalezko poltsa berrerabilgarriak banatu dituzte, eta, harategi zein arrandegietan, plastikorik ez erabiltzeko tuperrak eman dizkiete bezeroei.