2017an hasi zen lagun taldetxo bat proiekzioak antolatzen; hilean pare bat film eman izan dituzte –doan, eta harrera onarekin–, gai sozialak jasotzen dituztenak, eta musikarekin lotutako zinemaren zikloa eta Lorabarri Astekoak moduko emanaldiak –ekologia ardatz– ere bai.
Zinema zale aramaioarrez osatutako talde honek, baina, elkarte izaera hartu du orain; estatutuak egin eta erregistratu, Ikusiz Gozatu izenarekin. Elkartea erregistratuta, ikus-entzule klub moduko bat sortu dute, eta emanaldietara joateko bazkide izan beharko da; 10 euro izango dira urtean, 18 urtetik gorakoentzako. Emanaldien maiztasuna apur bat handitu eta hilean behin-edo solasaldiak egiteko asmoa dute.
Udalarekin akordioa
Elkarteko kide Alberto Onaindiaren arabera, orain egin nahi duten bestea da Udalarekin akordioa: "Horrekin, Udalak aretoa utziko liguke emanaldietarako, orain arte bezala, eta diru laguntza eman DVDak erosteko; DVD horiek liburutegian geratuko lirateke gero".
Hain justu, liburutegian bertan egongo dira datozen egunetan Ikusiz Gozatu elkarteko bazkide egiteko paperak. Lehen aukera, dena den, bihar –zapatua– bertan izango dute interesdunek; izan ere, elkartea sortu osteko lehen emanaldia egingo dute, Gorbeialdeko Kuadrillako Berdintasun sailarekin eta Aramaioko Itur-Zuri emakume elkartearekin elkarlanean. Fatima izeneko filma emango dute eta, horrekin batera, elkarteari buruzko azalpena ere bai, bertaratzen direnak bazkide egitera animatzearekin batera. 21:00etan izango da, kultura etxean.
Filmari dagokionez –frantziarra da–, arabiar jatorriko musulman etorkina da Fatima, bi alabaren ama: Souad, 15 urteko nerabea, eramaten zaila; eta Nesrine, unibertsitatean hasi den eta mediku izan nahi duen 18 urteko gaztea.