Auzo-konpostaje gunea martxan jarri zenetik 2.100 kilo hondakin organiko jaso dituzte

2015eko azaroan jarri zuten martxan Ibarrako auzo-konpostaje gunea, 40 familiarekin. Ordutik, 2.100 kilo hondakin organiko konpost bihurtu dituzte. Aramaioko udalak jarraipena egingo dio lehenengo gune horri, eta eskaera gehiago egonez gero, beste gune bat jartzea aztertuko du. Gainera, San Martin eskolan ere jangelako hondakin organikoa modu lokalean kudeatzen hasiko dira laster. 

Aramaioko Udaleko ingurumen teknikari Jon Toña "pozik" dago konpostaje guneak izan dituen emaitzekin. Osteta kaleko gunea martxan jarri zenetik –2015eko azaroa– 2.100 kilo hondakin organiko konpost bihurtu dituzte. Kopostaje gunean 40 familiak eman dute izena.

"Aramaioko konpostaje gunean hondakin kopuru hori kudeatzeak Gardelegiko zabortegira edota bestelako kudeaketa planta batera ez bidaltzea suposatzen du", dio Jon Toña teknikariak.

Konposta etxera eraman dute erabiltzaileek

Martxoaren 2an Aramaioko auzo-kopostaje guneko erabiltzaileek batzarra egin zuten. Balorazio "positiboa" egin zuten orokorrean; gainera, konposta etxera eramateko aukera izan zuten. Soberan geratutakoa, Udalak nekazarien artean banatzeko asmoa azaldu du.

San Martin eskolan ere, konpostaje gunea

San Martin eskolan ere, jangelako soberakin organikoa modu lokalean kudeatzen hasiko dira laster.

Eltxoekin arazoak

Auzo-konpost gunean, bestalde, arazoak izan dira azkenaldian eltxoekin. Nardeaga kaleko bizilagunek izan dituzte arazoak. "Gunea egoera onean mantentzeko norbait arduratu behar da konposta aireztatzeaz. Opor garai honetan inork ez du lan hori egin eta horregatik agertu dira eltxoak", azaldu du Toñak. "Vermicaneko teknikariak etxean egindako likido bat eman digu botatzeko; aurrerantzean konposta aireztatzeko arduradun bat egongo da", dio Toñak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.