Eusko Jaurlaritzaren Ekonomiaren Garapen eta Lehiakortasun Sailak baso-biomasa babesteko ekimena aurkeztu zuen urtarrilaren 9an Arkauten, instalazio publikoetarako eta norbanakoen etxeetarako energia ekoizteko alternatiba moduan.
Jaurlaritzaren laguntza praktikoa
Era berean, EEE eta HAZI erakunde publikoek ere bat egin dute ekimen honekin. Aramaiorekin sinatutako lankidetza hitzarmenari esker Jaurlaritzak honako laguntza emango dio Udalari: oinarrizko proiektua egitea, finantza-plana egitea, proiektuaren kontratazio publikoa erraztea eta obrak egikaritu eta onartzea.
Jardunaldi teknikoa etzi
Urtarrilaren 14ko jardunaldian zalantza teknikoak argitzeko aukera izango dute herritarrek; kultura etxean izango da, 18:30ean. Landa, itsasertz eta elikagaien sustapenerako HAZI fundaziotik Iñaki Gerenabarrena etorriko da eta Aramaioko baso-baliabideen egoeraren gainean egingo du berba. Energiaren Euskal Erakundetik Sergio Lopez eta Iñaki Boveda etorriko dira eta energiaren eskariaz zein proiektuaren bideragarritasunaz mintzatuko dira. Azkenik, instalazioak egingo dituen Factor 4 enpresako Guillermo de la Puente instalazio-tekniken ezaugarrien gainean arituko dira.
Aramaioarren atxikimendu gehiagoren bila
Orain arteko atxikimendu kopuruarekin "pozik" egon arren oraindik gehiago behar ditu Aramaioko Udalak. 130 bat atxikitu dira eta 270 bat izatea dute helburu.