"Beste hainbat eskoletan janaria kanpotik etortzen da prestatuta. Hemen jaki asko eskolan bertan prestatzen dira baina lehengaiak catering enpresa batek jartzen ditu. Gure asmoetako bat litzateke lehengaiak ere bertakoak izatea; horrek balioko luke, besteak beste, bertako produktuei beste irteera bat emateko", uste du guraso elkarteko Amaia Irizarrek.
Beste esperientziak ezagutzen
Azaroaren 26an hitzaldia antolatu zuten eskolako liburutegian, egun funtzionamenduan dauden beste esperientzia batzuk ezagutzeko. Orduñako Udalaren sukalde proiektua, Durangoko Kurutziaga ikastolako jangela eredua eta eskola jantokietan elikagai ekologikoak eta menu orekatuak txertatzeko Ekolapikoa programa ezagutzeko aukera izan zuten hitzaldi horretan: "Bestelako esperientziak ezagutzeko aukera izan genuen. Era berean, orduko eredua aldatu eta gaur egungoa lortzeko zela borrokatu duten ere ikasi genuen. Hemen badugu zer ikasi eta zer aprobetxatu esperientzia horietatik", dio Irizarrek.
"Onena" eta "merkeena"
Azaroaren 26ko saiora ez zen guraso larregi agertu; jendetsuagoa izan zen, ordea, otsail amaieran egin zuten bilera. Bilera hartan bi helburu nagusi zehaztu zituzten: haurren kalitatezko elikadura bermatzea eta herriko ekonomia sustatzea.
Guraso elkartekoek ez dute uste "justua" denik Jaurlaritzaren dekretu batek Aramaiori behartzea jangela eredua. Hala, eskatzen dute eredurik ez inposatzea eta baliabide zein laguntza berdinak eskaintzea eredu guztiei. Izan ere, zerbitzua eurek kudeatuz gero, aldea gurasoek ordaindu beharko lukete eta hori, diotenez, "sekulako karga ekonomikoa" da, Aramaioko guraso gehienendako "jasanezina".
Etorkizunera begira talde eragile bat sortu gura dute; gurasoek, baserritarrek eta beste eragileren batek osatuko luke. Izan ere, guraso elkarteak uste du bertako eredua "onena" izateaz gain, "merkeena" ere badela, Jaurlaritzak orain arte izan duen plana aldatzen badu.