Bisita gidatua erleen gainean berbetan hasi zuen Arriolabengoak: "Haien bizitza, diziplina, legeak, nola egiten duten lan, nola antolatzen diren... Azalpen luzea bezain didaktikoa izan zen; bertaratu zirenek galdera mordoa egin zuten eta oso solasaldi interesgarria izan genuen", adierazi du Alaiak-eko Cristina Etxenausiak. Gero, eztia nola egiten den bertatik bertara ezagutu zuten eta, horren ostean, erle-sare batek babestuta, erlez jositako erlauntza bat ezagutu zuten: "Jaiotzeke zeuden erleak nola babesten eta berotzen dituzten ikusi dugu".
Ikasi ostean, dastatu
Prozesu osoa ezagutu ondoren bi eratako ezti ekologikoa dastatu zuten Uribarriko elkartean, gazta apur batekin lagunduta: "Amaitzeko, inkesta bat osatu genuen eta guztiok, aho batez, puntuaziorik altuena eman genion. Hiru ordu eder igaro genituen Aldekoa baserrian. Erleen munduaren gainean asko ikasi genuen eta baita goi mailako eztia dastatu ere; giroa ezin hobea izan zen. Bide batez, beste erretiratuei gonbidapena egin gura diegu hurrengo baten parte har dezaten", esan du Etxenausiak.
Arriolabengoak, erretiratuez gain –martitzenean Bergarako 60 erretiraturen bisita izan zuen, umeak ere hartzen ditu bere baserrian: "Udalekutako 5 eta 6 urtetako umeek adi-adi jarraitu zituzten azalpenak, begiak handi-handi zituztela". Bisita gidatu baten izena emateko modurik eraginkorrena da 603 46 99 68 telefono zenbakira deitzea.
Zarzuelarako sarreren erreserba
Bestalde, azaroaren 29an Arrasateko Amaia antzokian egingo den La rosa del azafran zarzuelarako erreserba egin daitekeela jakinarazi dute Alaiak-ekoek: autobusa eta sarrerak erreserbatzeko 20 euro –bazkide ez direnek 22 euro– ordaindu beharko da elkartearen kontu korronte zenbakian, azaroaren 1a baino lehen.
