Hasteko, sagarra txikitu egiten da prentsan, ordu eta erdiz. Sagardoa nahi bada, txikitutakoa kupelean sartzen da zuzenean. Sagar-zukua gura bada, berriz, pasteurizatu egiten da zentroan bertan, 87 gradutan, eta gero botilaratu egiten da. Sagar kilo bakoitzetik edateko zenbat ateratzen den sagarraren araberakoa izaten dela dio Ezpeletak: "Portzentajeak %52tik %67ra artean ibiltzen dira, sagarraren araberakoa da. Aramaion gehien ikusten diren sagar motak dira errege-sagarra, bost kantoi eta Andra Mari". Ekoizleei dagokienez, Aramaiokoak bertakoak dira gehienak baina bailaratik zein bailara kanpotik ere etortzen dira; Ataun, Sopela eta Larrabetzutik, besteak beste.
Ia egunero lanean
Sagarra amaitu aurretik makinak "topera" ibiliko dira lanean: "Azarora arte gutxienez ia egunero egingo dugu lan, baita aste bukaeretan ere. Gaur [egubakoitza] arratsaldean ez dago eskaerarik eta hori salbuespena da. Ondo etorriko zaigu atsedena niri eta beste lankideari". Sagarrak dituen edonork erabil dezake Mendiolako zentroa sagar-zukua zein sagardoa egiteko: "Datorren astean [asteon] badaude tarte batzuk; gura duena etor daiteke".
Eraikina erabiltzen duten partikularrek sagar-zukua egiten dute gehienbat. Sagardoa egiten dutenen artean, Iturrieta sagardotegiko Juanjo Peciña harrapatu genuen jo eta ke lanean: "Zoritxarrez edo zorionez, garai honetan ordu asko pasatzen ditut hemen. Sagardotegiko edukiera bete egin beharko dugu eta hemengo sagarrekin nahikoa ez denean kanpotik ekartzen dugu".
Peciñak azaldu duenez, urtez urte gero eta sagardo gehiago ekoitzi behar izaten du: "Gero eta zabalagoa da sagardoaren kultura Araban. Gero eta jende gehiagori gustatzen zaio hemengo sagardoa eta sagardotegira etorri ostean errepikatu egiten dutenez, gero eta litro egin behar izaten dugu". 1.200 sagarrondo izan arren, aurten ere kanpotik ekarri beharko du sagarra Peciñak; joan den astean Lekeitio aldeko sagarrekin aritu zen lanean, esaterako. Sagardoak bi fermentazio behar izaten ditu: "Lehena, hemendik eramandako zukua altzairu herdoilezinezko biltegietan sartzen dugunean egiten du, zabalik utzita. Gero, dentsitatea aproposa denean biltegiak itxi eta bigarren fermentazioa egiten du. Horrela uzten da urtarrilera arte; San Sebastian egunerako dastatzeko moduan egongo da".