Lehenengo urratsa Aramaioko lurretan dauden interes bereziko txoko ekologiko garrantzitsuenak identifikatu eta sailkatzea izan zen eta orain ibilbide sarea diseinatu, egokitu eta ezagutzera ematen ari dira.
Natura 2000 sarearen baitan dauden eremuak, aparteko zuhaitzak, osasun egoera onean dauden baso eta errekastoak, mendizerrak eta bestelako natura-gune interesgarriak lotzea du helburu ekimenak, bertako zein kanpokoei begira. Izan ere, landa turismo jasangarria bultzatzea ere bada ekimenaren asmoa.
Auzolana izango du oinarri
Proiektu horretarako Udalak auzolana bultzatzeko asmoa du, izan ere, lan egiteko modu horrek bizirik dirau oraindik Aramaion. Horrela berreskuratu ahal izan dira zenbait ermita, herri-bide eta iturri: "Herriaren kultura eta natura ondarea errespetatzea lortzen da, gure arbasoek egindako lan bikainari eutsiz". Apiril amaieran egin zituzten lehen lanak; besteak beste, Tellerixa ibilbideak seinaleztatu zuten Ibarra kiroldegitik hasita. Laster beste ekintza batzuk egingo dira.
