Aramaixo, maila berrira egokitu ostean areto futbolaz gozatzen ari den taldea

Aramaixo taldeko jokalariak kiroldegian, azken entrenamendua hasi aurretik.
2013-2014 denboraldiak maila aldaketa suposatu du areto futboleko Aramaixo taldearendako. Iaz baino bi maila gorago jokatzen dute –Arabako onenen aurka– eta, ulertzekoa denez, igarri dute aldea. Lehen partiduetan jipoi galantak jaso zituzten, baina altxatu dute burua: "Gorantz goaz. Hasieran asko kosta zitzaion taldeari dinamika onean sartzea, baina orain itxura ona ari da hartzen", adierazi du taldeko koordinatzaile Andoni Elejaldek.

Jokalari batzuk taldea utzi dute–Jokin Balantzategi, esaterako, orain gutxi joan da Kolonbia aldera– eta aurpegi berri batzuk ere badaude, aramaioarrak zein arrasatearrak.

Maila berrira egokitzen

Maila berria "zorrotza" dela onartu arren, egokituko direla uste du Elejaldek: "Helduko diogu. Ez dut uste maila mantentzeko arazorik izango dugunik eta gure esperantza da goiko taldetxora batzea. Ea lortzen dugun". Partiduetan erakusten den mailak entrenatzen den moduarekin zerikusi zuzena duela sinestuta, entrenamenduen dinamika "ona" dela dio arduradunak: "Estrategia jokaldi berriak astiro sartzen joan gara eta esango nuke ondo ari garela lanean, oraingoz".

Instalazioak berritzeko beharra

Kiroldegiaren egoeraren gainean galdetuta, aldaketa batzuk beharrezkoak direla uste du Elejaldek. Joan den astean konpondu zituzten apurtutako leihoak –haizea eta euria eginez gero arriskua zegoen partiduren bat bertan behera geratzeko–, baina horrez gain badago zer hobetu, Elejaldek dioenez: "Inbertsio bat egin beharko litzatekeela esango nuke. Zahartuta geratu da, instalazioek berrikuntza bat behar dute. Hamar urte darama kiroldegiak nahiko utzita. Era berean, materialik ere ez dago apenas; duela hamar urte erositako baloiekin jarraitzen dugu".  

Horrez gain, itoginak ohikoak dira eta neguan hotza da protagonista: "Gasteizen jokatzen dugunean edadeko jende askotxo egoten da, eta horretan ziur laguntzen duela kiroldegi barruko epeltasunak. Etxeko partiduetan jende gaztea egoten da baina adineko jenderik ez. Egiten duen hotza egingo ez balu etorriko lirateke akaso...", uste du Elejaldek. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.