Aramaioko birziklatze-tasa igo ahal izateko "ezinbestekoa" da herritarren inplikazioa eta parte hartzea, zinegotziaren arabera: "Herritarrak sentsibilizatu gura ditugu, ingurumena zaintzea guztion ardura delako".
Konposta eta ortu ekologikoak
Birziklatze kanpainaz aparte, Ingurumen eta Nekazaritza batzordean lantzen ari diren beste bi proiektuak aipatu dizkigu Beitiak. Ekimen horien berri ere etxez etxe emango diete herritarrei, gutun bidez.
Batetik, auzo konposta egiteko gune bat jartzea aztertzen ari dira; etxeko hondakin organikoak –sukalde hondakinak, fruta azalak, errautsa, kafe eta infusioen hondarrak, zuhaitz eta landareen kimaketa hondarrak...– biltzeko gune bat egokituko luke Udalak. Beitiak adierazi digunez, herritar batzuk erakutsi dute interesa konposta egiteko.
Bestetik, ortu ekologikoak bultzatu nahi dituzte. Ortu horiek interesatuta dauden herritarrei eskainiko litzaizkieke, modu jasangarri eta ekologikoan lantzeko baldintzapean.
Bi proiektu horietan parte hartzeko eskutitza erantzun edo honako bi bideak har daitezke: 945 44 50 16 telefono zenbakira deitzea edo udala@aramaio.org helbide elektronikora idaztea, izen-abizenak eta telefonoa adieraziz. Erantzuna emateko azken eguna da azaroaren 28a.