30 bat lagun, bizikletak hartuta, Aramaioko Abiadura Handiko Trenaren plataformara igo dira. Han, tren lasterraren aurkako ohiuak egin eta pankarta bi zabaldu dituzte. "Munduko bide gorririk garestiena" zioen batek. Zubibide guztian zehar ibili dira protestan, aurrera eta atzera. Ez da inolako istilurik egon; lanetan ez zen langilerik. Aurrera, Garagartza aldera, jo dute tunelean barrena: "Nik Elorrio ezagutu nahi dut" esan du martxan dabilen nafar batek.
Aramaion bazkaldu eta arratsaldean, Angiozarrera joango dira bizikleta-martxan dabiltzanak. Hitzaldia eta eztabaida izango dira han, 19:00etan. Pablo Sastre idazleak eta Jose Angel Mikeok Angiozarko auzo-alkate eta batzarraren historiaz jardungo dute.