Juan Jesus Ramos: "Aramaion biomasa sistema jartzea lortuko da"

Hilaren 16an Kultur etxean egindako biomasaren gaineko jardunaldia arrakastatsua izan zen. Biomasa sistemekin lan egiten duen Avebiom elkarteko Juan Jesus Ramosek, adibidez, argi egin zuen berba: "Aramaiok gai honetan zituen kezkak ezagutzen nituen aurrez. Banekien Aramaion berogailu sistema edo sare bat jartzeko planteamendua zegoela. Guk, Avebiom elkartetik, instalazioen erregistro bat egiten dugu biomasa kontsumitzen duten erabiltzaileena. Aramaioko instalazioa proiektu moduan erregistratu nuen zerrenda horretan, eta ez dut kenduko. Izan ere, Aramaion biomasa sistema jartzea lortuko dela uste dut".

Ramon Ajuria alkatea "oso pozik" zegoen: "Oso aberasgarria eta interesgarria izan da. Jende asko etorri da, asko dakiena, eta eztabaida politak egon dira". Helburu nagusia herritarra kontzientziatzea zela gogoratu du Ajuriak.

Era berean, Santiago Arevalo Enguerako (Valentzia) alkateak eta Remufor elkarteko kideak ere defendatu zuen biomasa bidezko sistema: "Ez gabiltza ezer berria asmatzen. Gaur egungo teknologiarekin gure arbasoen lan egiteko modua ari gara praktikan jartzen, besterik gabe".

Beste saio bat bihar

Alaiak elkarteak energia horniduraren gaineko hitzaldia antolatu du biharko, Kultur etxean (18:30). Xabier Arriolabengoa teknikariak Aramaioko argindarraren kudeaketa izango du hizpide eta alkateak, berriz, energia lortzeko Aramaiok dituen baliabideak azalduko ditu.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.