Etxaguen auzoko eraberritze lanei dagokienez. guztira 37 enpresa aurkeztu ziren lehiaketara eta horietatik baja arina (temerarioa) eskatu dute zortzik. Baja horiek aztertu bitartean, Mecuma enpresaren aukera atzera bota du Udalak. Ramon Ajuria alkatearen arabera, atzoko plenoan esleitu gura zituzten lanak baina ez da posible izan. EAJko zinegotzi Iñaki Nafarratek, berriz, eskatu zuen gaia hirigintza batzordetik pasatzea: "Oso obra garrantzitsua da eta plenora ekarri aurretik batzordetik pasa beharko litzateke".
Garoña ixtea, aho batez
Bestalde, bi mozio aurkeztu ziren atzoko plenoan. Lehena, Garoñako zentral nuklearra ixtea eskatzeko mozioa, Bildu eta Aramaio Alkartasunak aurkeztu zuten baina EAJko zinegotziak bat egin zuen azken orduan eta hiruen izenean aurkeztu zuten.
Bigarren mozioa Blduk aurkeztutakoa izan zen, Gipuzkoako azpiegitura lan handiak geldiaraztearen aldekoa: "Gipuzkoarekin dugun gertutasunagatik eta lan horietako batek zuzenean eragiten digulako bat egiten dugu mozioarekin", adierazi zuen Bilduko bozeramaile Lierni Altunak. EAJk eta Aramaio Alkartasunak aurka bozkatu zuten.
EAJk hainbat kexa
Iñaki Nafarratek (EAJ) hainbat kexa azaldu zituen. Besteak beste, Hirigintza Sailaren kudeaketa berantiarra aipatu zuen: "Berandu dabil Hirigintza, atzerapen handiak ematen dira herritarrek, adibidez, konponketa bat eskatzen dutenean. Akaso batzordeak maiztasun gehiagorekin egin behar dira". Hirigintza zinegotzi Andoni Solupek honakoa erantzun zion: "Hainbat gai ditugu eta lehentasunak markatu behar dira. Ez dut uste batzorde gehiago egitea eraginkorra izango den, izan ere, batzorde horietara gaiak landuta eraman behar dira teknikoen eskutik eta askotan ez dago horretarako aukerarik. Hala ere, kontuan izango dugu eskaera".
Horiez gain, kiroldegiko kantxa zikin dagoela salatu zuen EAJko zinegotziak. Eta, besteak beste, Cuatrovientos baserriko irteeraren gainean nobedaderik dagoen galdetu zuen. Ramon Ajuria alkateak erantzun zion esanez, trafikoa erregulatzeko eskaera egin dela eta obra osoaren gaineko argibideak Adif edota Diputazioari eskatzeko.
Amaitzeko, elurtea dela-eta eta gatzaren erabilera zehazteko eztabaidan aritu ziren Nafarrate eta Zerbitzuetako zinegotzi Jose Ramon Uribe.