Gazteleraz gidatutako jardunaldian, Ana Digon hizlariak Aramaioko zinema aretora gerturatutakoei labur-labur euren burua aurkezteko eskatu zien. Denetariko arrazoiak eman zituzten bertaratutakoek: ikastera joan zen langabetutik hasita bizitza osoan zehar bere ortuan lan egin duen nekazariaren kasura arte. Eta guztiek, ikastea helburu.
Lurra berritu eta emankorra egin
Hainbat kontzeptu azaldu zituen Digonek. Hasteko, jasangarritasunaren kontzeptua aldatu behar dugula aldarrikatu zuen: "Hamaika aldiz entzuten dugu jasangarritasuna, han eta hemen. Baina Amalurrari kalte larregi egin diogu dagoeneko eta boterean daudenek planteatzen duten jasangarritasunaren eredua ez da nahikoa".
Darren Doherty permakulturan aitzindari izan denaren laguntzaileak ingurumenak planteatzen dituen erronken aurrean nekazaritza birtsortzaiilea defendatu zuen, hau da, lurra berritu eta emankorra egiteko adibide praktikoak eman zituen.