Corten altzairuzko txaparekin eta kristalarekin osatutako bitrina batek babestuko du Antzuolako narrugintza gogoratzeko erakustokia. Estalpe hori egiteko lanei ekin diete dagoeneko, Udalaren garabiak eraman baitu dagoeneko erakustokia txapaz babestera. Hurrengo pausoa kristala jartzea izango da, baina hori Antzuolan egingo dutela aurreratu dute Narruolako kideek. Udalak 3.070,89 euroko aurrekontua bideratu du osotara.
Hala, datorren astean erakustokiaren barruan zer jarri erabakiko dute Udalak eta Narruolak. Asmoa iraganeko narru-ontzaileek erabiltzen zituzten tresnak eta emakume uhalgileek egindako produktuak jartzea da. Erakustokiari informazio-panel batek lagunduko dio, eta QR bat izango du Antzuolako iraganeko narrugintzan sakontzeko.
Erakustokia udan zehar egokituko dute Koxkor Ogiberri pareko plazatxoan, ziurrenik, Antzuolako jaien aurretik.