Dardoen gaineko zaletasuna "oso handia" dela adierazi zuten txapelketa antolatu zuten Kristyna Ovsakovak eta Cristian Ariasek. Antzuolako Munstroak taldeko kideak dira, baina ez ziren izan lehiaketan parte hartu zuten bakarrak; izan ere, 300 dardolari inguru elkartu ziren, eta Espainiako hainbat txokotako dardolariak eta Txekiako Errepublikako hainbat ordezkari ere izan ziren. "Dardo lehiaketatan egindako harremanei esker" lortu zuten Ovsakovak eta Ariasek gaur egun munduko onenen artean lehiatzen diren jokalariak ekartzea; horietako bat da munduko txapelduna den Ricardo Perez Riki. Haren esanetan, "antolatzaileekin izandako harreman onak" eraman du Antzuolan jokatzera: "Zaletasun handia dugu dardoekiko, maite dugun kirol bat da. Adiskidetasun handia dugu Antzuolakoekin, eta hona etortzeko eskatu zigutenean, ez genuen birritan pentsatu".
Egindakoarekin "harro"
Ongi Etorri jatetxearen dardo lehiaketa antolatu duen Ovsakovak adierazi du "lan handia" egin behar izan dutela lehiaketa antolatzeko, eta "oso harro" daudela egindako guztiarekin. "Antzuolako taberna bat dardolariz betetzea izugarria da; esango nuke ia ezinezkoa den zerbait egin dugula, eta oso harro gaude hori egin izanagatik", gaineratu du.
Sailkapenak
Dardoen hainbat modalitatetara lehiatu dira asteburuan, eta bakarka zein bikoteka egin dute. Honako hauek izan dira bakarkako eta bikotekako sailkapenak:
Bakarkako lehiaketa:
- Rixi.
- Smarlin.
- Toni Alcinas.
Binakako lehiaketa:
- Smarlin-Juanlu.
- Riky-Davila
- Abdel-Maykon