Puntua aldizkariaren 484. zenbakiko Argazki zaharra atal berrian argitaratutakoa da honakoa. Horrelakoak gustuko badituzu egin zaitez Goienakide eta astero-astero jasoko duzu Puntua zure etxean.
Bertan, aurreko mendeko 50eko hamarkada bukaeran Antzuolan sortu zuten atletismo taldeko kideak agertzen dira: korrikalariak 17 urte ingururen bueltan ibiliko dira, eta Arrasaten jokoan egon zen proba batean ateratakoa da argazkia.
Entrenamenduak
Ramirez de Okarizek azaltzen duenez, Jose Luis Errasti zen atleta gazteen entrenatzailea, eta, herrian atletismo pistarik ez zegoenez, lan-jardunaren ostean Antigua eta San Blas artean korrika eginez entrenatzen ziren. Historialariaren arabera, gainera, behin entrenamendu saioetan egin beharrekoak egindakoan, Antiguako tabernan elkartzen ziren tragoxka bat hartzeko. Argazkian agertzen diren atletek kros modalitatean parte hartzen zuten, eta Oñatin, Bergaran, Aretxabaletan eta Lasarte-Orian jardun zuten probetan emaitza onak lortzen omen zituzten. 1962an Antzuolan bertan ere egin zuten atletismo txapelketa, eta, hain zuzen ere, urtebete lehenago (1961) sortutako Danok Bat elkartea ibili zen proba sustatzeko lanetan
• Argazkia noizkoa: ustez, 1958koa.
• Herria: Antzuola.
• Argazkilaria: Arregi familia.
• Artxiboa: irinmodo.blogspot.com