Torresoroatik abiatuta, kale-jira egingo dute, eta 12:00etan Herriko Plazan elkartuko dira dantza saio nagusia egiteko. "Denetarikoak egingo ditugu: historikoki mutilenak izan direnak, historikoki neskenak izan direnak, baita mistoak ere. Zorionez horren tradizionala den diziplina baten gauzak asko aldatzen ari dira. Dantza horiek guztiak elkarrekin egingo ditugu, eta, horrez gain, talde bakoitzak berea. Eta saioa borobiltzeko publikoa ere dantza egitera gonbidatuko dugu", dio Oinarin taldeko Jon Matak.
Topaketa "garrantzitsua"
Herriz herri lekukoa aldatuta, urtero egiten duten "gustuko" topaketa da eskualdeko dantzariendako. "Esango nuke topaketa hori bailara mailan herri-artekotasun handiena edo jendetsuena duena dela. Helburuak hainbat dira: batetik, kultura transmisioa, nola ez, eta bestetik, herri ezberdinetako dantzarien arteko harremanak estutzea eta elkarrekin ondo pasatzea, dantza tradizionala horren esparru serioa ez dela erakutsita".
