Eguenean, hilaren 18an, hasiko dira Antzuolako jaiak, eta aldaketak eragingo dituzte trafikoan. Kalebarrenetik hasi eta Buztinzuriraino itxita egongo da errepidea, baita Sagastitik –eskola atzetik, gutxi gorabehera– pilotalekuaren osteraino ere. Horrez gain, domekan, hilaren 21ean, bigantxak izango dira Ondarren, eta, beraz, autoek ezingo dute aparkatu ez Ondarre plazan, ez Ondarre eta plaza arteko bidean.
Hondakin zerbitzuan ere aldaketak izango dira: uztailaren 17an, traste zaharrak atera beharko dira; 19an, ontzi arinak; 20an, organikoa; eta 21ean, errefusa. Hala ere, Sanjosepeko larrialdi-gunean organikoarentzat eta ontzi arinentzat edukiontziak jarriko dituzte, eta Ondarrerako bidean beirarentzako beste bat. Gainontzeko egunei dagokienez, ez da aldaketarik izango.
