Zinemako ohiko pantailetan maiz ezkutatzen diren errealitateen berri emateko eta gizartean eragin nahi duen tresna eraldatzailetzat erabiltzeko asmoz, KCD Bilboko gobernuz kanpoko erakundeak Zinema Ikusezinaren Nazioarteko Jaialdia abiatu zuen duela hamabost urte, Film sozialak izenpean. Hiritik at, ordea, herriz herri ere egiten dituzte emanaldiak, eta, orain, Antzuolara iritsiko da. Jaialdiko sei lan ikusteko aukera izango da egubakoitzean, 18:30etik aurrera, Torresoroa aretoan.
Herritar batek eginiko proposamenari tiraka, Anelkar elkartasun taldeak antolatu du ekitaldia, Udalaren laguntzarekin. Jabi Etxaniz taldekideak azpimarratu duenez, asmoa da film laburren bitartez gai jakin batzuen ikusgarritasuna bermatzea, hala nola giza eskubideak, jasangarritasuna, kulturartekotasuna eta berdintasuna. "Lehen aldiz egingo dugu Antzuolan. Gustatuz gero, datorren urtean bi eguneko saioak egitera ere animatuko gara".
Hainbat dira jaialdian aurkezten dituzten ikus-entzunezko lanak, baina herrietara ez dituzte guztiak eramaten; gobernuz kanpoko erakundeko kideak arduratzen dira tokian toki hautaketa bat egiteaz. Horretarako, besteak beste, kontuan hartzen dute egilea gizonezkoa, emakumezkoa ala kolektibo bat den, eta baita lantzen den gaia zein den ere. Hala, Antzuolan, sei lan hauek izango dira ikusgai: Broken Wings, In the shadow of pigeon wings, Arnasa, Mothertruckers, Imelda no esta sola eta Si me querei, irse.
Lankidetza proiektuak
Jaialdia antolatzeaz gainera, KCDk garapenerako hainbat lankidetza proiektutan dihardu lanean hainbat herrialdetan, hala nola Senegalen, Kuban, Kolonbian, El Salvadorren, Mexikon, Guatemalan, Egipton eta Nikaraguan.
Sei lan aurkeztuko dituzte
Zinema Ikusezinaren hamabosgarren nazioarteko jaialdiko sei lan ikusteko aukera izango da egubakoitzean, Torresoroan, 18:30etik aurrera.
Broken Wings, Jorik Dozy eta Sil van der Woerd
Dokumental musikala da, Asia hego-ekialdeko isileko hegazti ehizaren berri lehendabizikoz azaltzen duena. Hegazti tropikalek basotik kaiolara egiten duten bidaia kontatzen du, nola ari diren azkar husten oihanak eta nola dauden desagertzeko zorian 1.500etik gora hegazti espezie. Apenas inork daki hondamen horren berri.
Si me querei, irse, Sofia Muñoz
Fikziozko film laburra da. Igandero bezala, paella bat ari da prestatzen Juana, familia inguruan duela. Baina senarrak erretiroa hartu duela jakiteak zapuztu egiten du ospakizuna.
In the shadow of pigeon wings, Ahmed Mücahid Aydogan
Libanoko errefuxiatu-eremuetan bizi diren palestinarren erretratua azaltzen duen dokumentala da.
Arnasa, Raul Barreras
Fikziozko film laburra da. Muino batean eserita, bertso bat kantatuz azaldu du Inaxiok emaztearen heriotzak eragin dion atsekabea. Kantuak erakarrita edo, baserrira itzuli da Ekaitz, Inaxioren biloba, aitonari laguntzera, abereak zaintzera. Inguruan dutenaz ikuspegi desberdinak dituzten arren, berriro bat egin eta etorkizunaren erronkei elkarrekin aurre egitea erabaki dute.
Mothertruckers, Paula Romero
Gutxi hitz egiten da emakume kamioilariez, eta hutsune hori betetzea du xede Mothertruckers dokumental laburrak. Erresuma Batua garraio –eta erregai– krisi larria pairatzen ari zen Brexit ondorengo garaian dago girotua, eta gizonezkoak nagusi diren lanbidean emakume izateak dakartzan gorabeherak aztertzen ditu. Halaber, bi ikuspegi jartzen ditu aurrez aurre: errepidean libre ibiltzearen ideia erromantikoa eta bizibide gogor eta ohiz kanpokoa.
Imelda no esta sola, Paula Heredia
El Salvadorko sistema legalean harrapaturik dagoen nerabe baten istorioa dugu; dokumentala. Larrialdi obstretiko bat izan du Imeldak, eta ospitaleratu egin dute. Abortatu izana egotzi diote, okerki, eta atxilotu. Imeldaren askatasunaren aldeko borroka kontatzen du filmak, berea eta inguruko emakumeena, denek baitakite aitaordeak bortxatuta geratu zela haurdun. Emakumeen eskubideak gero eta urriagoak diren lurraldeetan zer ari den gertatzen azaltzen du.