Aiherra (Nafarroa Beherea) eta Antzuola –edo alderantziz– batzen dituen Mugak zubi ibilbidea aurkeztu zuten joan den astean Urruñan (Lapurdi), bi herrien senidetzea are gehiago sendotzeko ez ezik, mugez harago herria egiteko asmoz.
Hilaren 25ean lehen etapetako bat egin zuten elkarrekin bi herrietako lagunek, Lekornetik (Lapurdi) Aiherrara bitartekoa, jatorrizkoa Itsasutik (Lapurdi) hasten den arren, eta, orain, Legazpitik Antzuolara artekoa egingo dute.
Lekornetik Aiherrara arteko ibilbideko irudi bat. Argazkia: Jean-Mixel Barbier.
Domekan izango da hori. Aiherratik etorriko dira inguruotara, eta Legazpin izango dute lehen elkargunea; antzuolarrak 08:45ean aterako dira harantz, Sagastitik. Oinez iritsiko dira Antzuolaraino, Arrola menditik, eta, ondoren, senidetzearen isla den zuhaitza landatuko dute herrian.
Bazkaria ere egingo dute, herriko elkarte batean.