"Askotariko adinetako emakumeek hartu dute parte saioan. Gazteenak 18-20 urtekoak ziren; gehienak, 40-45 urtekoak, baina erretiratu batzuk ere bazeuden, eta hori asko gustatu zait", dio Carrascok. "Lehenik eta behin, azaldu diet ni ez naizela terapeuta, dantzaria baizik, eta dantzaren esparrutik egin dugu lanketa. Izan ere, dantzak badu osagai terapeutiko bat eta, era berean, sortzailea da". Beraz, dantza garaikidearen eta inprobisazioaren bitartez, gorputza landu dute, bukaeran performance bat osatzeko.
Saio gehiago gura dituzte
Martxoaren 8aren bueltan egindako saioa izan da, baina parte-hartzaileak "oso gustura" geratu dira. Hori dela eta, horrelako saio gehiago egiteko eskaera egin dute, eta Carrasco bera ere prest azaldu da horretarako. "Egia da astean zehar nahiko okupatuta ibiltzen naizela dantza akademiarekin, baina horrelako saio puntual gehiago egiteko prest egongo nintzateke, duda barik. Oso aberasgarria izan da guztiontzat", nabarmendu du.
