Joan den astean Elgetan egin bezala, aste honetan Antzuolan hartu dute ostatu hiru antzerkilariek, doluari buruzko Eresia obraren sormen-prozesuan murgilduta jarraitzeko. Zuñigak azaldu du "esperientzia eszeniko, bisual eta poetikoa" aurkeztea dela asmoa, "ohiko dramaturgiatik ihes eginda eta konkrezioetan sartu gabe".
Antzezlana urtarrilaren 15ean estreinatuko dute, Bergarako Seminarixoan; Elgetara eta Antzuolara, aldiz, otsaileko lehen asteburuan ekarriko dute. Aurretik, azaroan zehar, aktoreak Debagoienera itzuliko dira, bertako herritar eta kultur eragileekin sormen lanaren inguruko elkartrukea egiteko.
Udalbiltzak lagundua
Udalbiltzaren Geuretik sortuak beka-sortaren baitako 26 proiektuetako bat da Eresia. Ekainean Antzuolako, Bergarako eta Elgetako udalek aho batez onartu zuten proiektuok babestea; Antzuolako Udalak 9.000 euro jarri ditu bekak hauspotzeko.