Zerbitzuak hamarkada bete duen honetan, atez ateko zintzilikarioak berregokitu egingo ditu Debagoieneko Mankomunitateak, Antzuolako Udalaren eskariz. 2020ko irailean egin zuen eskaria eta onartu zuen Mankomunitateak. Helburua hondakinak biltzeko zerbitzua hobetzea da. "Ohartuta geunden behealdeko tokian ez dela zintzilikatzen zegokion poltsa edo ontzia. Lurrean uzten ziren eta animaliek dena zabaldu eta zikindu egiten zuten ingurua. Horrek behealdeko tokia kendu eta zintzilikarioan egokitzea ekarri du", argitu zuen orduan Beñardo Kortabarria Antzuolako alkateak.
Berrerabilitakoak
Bere garaian Bergaran eta Aretxabaletan kendu zirenak egokituko ditu Mankomunitateak. Guztira, 37 zintzilikario jarriko dira. Orain dauden guneak mantendu egingo dira, baina Irimoiko baserriendako aukera egongo da, zintzilikarioak jartzeko tokia aurrez ezarrita baitago. Mankomunitateak kostua bere gain hartuko du.
COVID-19aren krisia
Pandemia betean herritarrek hondakinak ez dituztela behar bezala sailkatu aitortu du udalak: "Gezurra badirudi ere, osasun larrialdian hondakinak biltzeko sistema guztiek, ez soilik atez atekoak, beherakada izan dute bailaran. Orain, berriro igo da sailkatze-tasa, zorionez".