Antzuolako Eguneko Zentroko hamabi erabiltzaileetatik hamaikak jaso dute Pfizer etxeko txertoa. Txertaketa azkarra eta erraza izan dela aitortu du zentroko arduradun Beatriz Guelbenzuk: "Erabiltzaileek oso pozik hartu dute txertoa; lasaitasuna ekarri digu. Hamabi erabiltzaile daude, baina batek ezin izan du etorri. Hala, ordezkoen zerrendan zegoen langileari jarri diote poteko azken txertoa". Gaineratu du bakarren batek besoko min pixka bat izan arren guztiak daudela ondo, albo-kalterik gabe. Bigarren dosia hemendik hiru astera hartuko dute.
Ordezkoen zerrenda
"Erabiltzaileen eta langileon zerrendak Diputazioak ditu; adinaren arabera txerto ezberdina jarriko digute. Hala, 55 urtetik beherakoei AstraZeneca jarriko diete. Erreserba zerrenda ere badugu, eta, aipatu dudan bezala, langile batek jada hartu du txertoa. Gainontzekook, aldiz, oraindik ez dakigu noiz txertatuko gaituzten eta zein irizpide jarraituko duten".
