"Jada uste genuen ez zela jokatuko, baina ilusioz gaude eta oso pozik erabakiarekin; partidu guztiak irabazten genbiltzan, eta pena izango litzateke", azaldu dute. Azken bi hilabeteotan, ahal bezala egin dituzte entrenamenduak. "Etxeko hormetan eskuak egiten ibili gara; eta arrabolean ere aritu gara. Ziurtagiri batekin, ordea, pilotalekura joateko aukera ere izan dugu, eta ondo erantzun dugu; pixkanaka, geneukan sasoia berreskuratzen hasiak gara", diote Galeano ahizpek.
Ilusioz daude, finalerdia jokatzeko aukera izango dutelako. Pilota Goxoa kategorian teknikoki onak diren aurkariak dituztela diote: Ainhoa Ruiz de Infante eta Amaia Jaka.
Asteburu erabakigarria
Master Cup-eko antolakuntzak finalerdia eta finala bata bestearen atzetik jokatzea erabaki du, ekainaren 26an eta 28an, hurrenez hurren, Elgoibarren.
