Gaixo dauden euskal preso politikoek jasaten duten egoerari presentzia emateko asmotan hainbat ekintza antolatu dituzte azaroan zehar Antzuolan.
Hala, azaroaren 19an, Olaranen gaixotasunen tratamendua eta zaintza kartzelan izango dira aztergai Jaiki Hadi medikuekin. Bestalde, azaroaren 23tik abenduaren 1era arte, erakusketa antolatu dute Bertan preso eta preso ohiek egindako lanak izango dira ikusgai.
Abenduaren 1ean ere Joxe Mari Carrere ipuinak kontatzen izango da herrian, arratsaldeko 18:30ean. Adin guztietara zuzendutako ekintza izango da eta tartean Eltzikorta-ren ipuin bat ere kontatuko du: Txori mezulariak.
Bailara mailako ekintzak
Herri mailan antolatu dituzten ekintzez gain, azaroaren 29an, Sarek bultzatuta zenbait ospitaletara bertaratzeak egingo dituztela azaldu dute: "Anbulantzia bat ari da Euskal Herriko txoko denetara iritsi nahian, preso gaixo larrien egoera salatuz eta hauek etxean behar dutela zabalduz. Azaroaren 29an, bailara mailan agerraldiak egingo dituzte; Eibar eta Mendaron egon ostean, ordu batean Arrasateko ospitalean izango dira. Anbulantzia honek presentzia izango du Antzuolan egingo den manifestazioan".
Hain zuzen hurrengo egunean, azaroaren 30ean, Ez dot moztuko bizarra eta Sareren deialdiari jarraiki bailara mailako manifestazioa egingo dute Antzuolan, Larriki gaixo dauden presoak etxera, Eltzikorta etxera lelopean.
