Eguaztenean hasi zituzten Torresoroa aretoa konpontzeko eta berregiteko lanak. "Abuztuan gelditu egingo da obra eta iraila hasieran berriz hasiko da", argitu du Hirigintza teknikari Valen Moñuxek. Behin lanak abiatuta, bi hilabeteko epean egin beharko dira eta udazkenerako amaituta egon beharko dira. Torresoroa berrituak baina, izango ditu hobekuntzak: sarrerako bigarren atea automatikoa izango da; gizarte laguntzailearen inguruko segurtasun kontuak direla-eta kamera jarriko da; ikasteko gune berria sortzeko ate bat aterako da; eta kanpoaldea margotuko da, besteak beste.
Eskola handitzeko lanak, hastear
Eta esan ere Hezkuntza Sailaren arabera, uztailaren 29an, astelehenean, hasiko dela eskolako obra. Obra sakona izango da eta urtebeteko epean egingo dira. "Handitze sakona izango da. Hala, 300 metro koadroko azalera irabaziko du eskolak. Aurrefabrikatutako gelen espazioa ez ezik; alboan daukan espaloiaren eremua ere oso-osorik hartuko du. Luzeran ere irabaziko du espazioa". Informazioa eta argazkiak hemen.
Antiguako errotako presa
Urtebete pasatxoren ostean, uztailean egingo da Antiguako errotako presa konpontzeko obra. "Jaurlaritzako Ura departamentuak baimena eman digu eta baldintza da uztailean egitea obra. Echaide enpresak egingo du. Datorren astean hasiko dira lanean eta obra motza izango da", argitu du Moñuxek.