Berdintasunaren aldeko 2017ko Emakunde Saria jaso du Virginia Imazek

Itziar Larrañaga Sarasola 2018ko api. 24a, 18:09

Saritua, Iñigo Urkullu Lehendakaria eta Izaskun Landaida Emakundeko zuzendaria alboan dituela.

Iñigo Urkullu lehendakariaren eskutik jaso du Virginia Imaz clown eta aktoreak Emakunderen saria. Azken 30 urteetan zehar, arte eszenikoen bidez berdintasunaren aldeko sentsibilizazioan egindako lana aitortu diote Imazi sari honekin.

Iazko azaroan iragarri zuen Emakunde Sariko epaimahaiak Virginia Imazi emango ziola 2017 Berdintasunerako Emakunde Saria. Orduan esan zutenez, Imaz saritzeko arrazoi nagusiak izan ziren hark emakume eta gizonen berdintasun eza ikustarazteko egindako lana, eta "kontzientzia feminista" duen ipuin kontalari eta pailazo bezala egindako ibilbide luzea eta ausarta.

Epaimahaiaren hitzetan, "arte eszenikoen alorrean aitzindaria eta berritzailea izan da Imaz, etiketen kontra borrokatu du eta pailazo ofizioaren duintasuna eman dio, era honetara, kultur arloko beste hainbat emakumeren erreferente bihurtuz".