Lehenengo lana terrenoa garbitzearena izan dute. "Sasiak eta belarrak kendu ditugu sasi-garbitzeko makinarekin. Tuneletan, aldiz, harriak zeunden. Makinak alokatu genituen horiek kentzeko eta terrenoa libratzeko", azaldu du Ion Arangurenek.
Baina, emaitzak ikusi ahala, hasierako proiektu xumeak, orain, beste dimentsio bat hartu duela kontatu dute: "Goizperrek diruz lagundu du gure proiektua. Horri esker, hiru tuneletan argiak jarriko dira. Argiak jartzeko zuloak eginda daude gainera. Asmoa da lurra bota aurretik, argiak ipintzea datozen egunetan. Gipuzkoako Diputazioak eta Udalak ere konpromisoa hartu dute proiektuaren dimentsioa ikusita. Hala, lurra ahalik eta leunen uzten saiatuko gara euren laguntzari esker", gaineratu dute.
Herritarrendako erabilgarri
Kilometro batzuk gehiagoa lautadan egiteko aukera dute aurrerantzean antzuolarrek.
Herritarrek gustura hartuko duten albistea izango dela uste dute Urtzelaik eta Arangurenek. "Beste lotura bat ematen du trenbide zaharraren ibilbideak. Urretxuraino edo Bergararainoko loturak ditu. Uste dugu bidea garbi egonda jendea animatuko dela erabiltzera. Bergararekin lotura zuzena dauka orain; etorkizunean Zumarragaraino bidea zabaltzea izango litzateke asmoa". Galartza, Uzarraga, Lizarra, Irimoi eta Basalde auzoetan barrena pasatzen da trenbide zaharra, herria zeharkatuz.
Jauregiko tunela urez
Lanik handiena Jauregiko tunelak eman diela diote Eñaut Urtzelaik eta Jon Arangurenek: "Guztiz itxita zegoen tunela; lurra bi aldetara zeukan erorita. Gure helburua hori libratzea izan da. Putzu handi bat ere bazegoen alderik alde; dena lokaztuta topatu genuen. Gainera, neguan egin genituen lanak, eta horri, eguraldi txarra ere gehitu behar zaio", kontatu dute.