Asebio/Genoma da sariketa. Espainia mailan antolatzen da eta helburua du bioteknologia dibulgatzea. Expansión, Cinco Días eta Público paperekoetako lanak ere saritu dituzte. Teknopolis saioko erreportajea Nagore Rementeriak eta Alaitz Otxoa de Eribek egin dute, Beñardo Kortabarriarekin batera. 3.000 euroko saria da. Sari nagusia. Epaimahaiak aitortu du lanaren kalitatea, argi aurkeztu izana, dokumentazio lana, gaiaren gaurkotasuna eta dibulgaziorako erakutsitako dohaina. Era berean, ekonomian eta, oro har, jendartean, bioteknologiak sortzen dituen onurak zabaltzeko erakutsitako dohaina.
Maiatzean banatuko dituzte sariak Madrilen.
"Oso pozik"
Beñardo Kortabarriak oso pozik hartu du sariaren berria. "Programa txikia izanik, ia promoziorik ez duena, programazioan galduta dagoena... horrelako sariek aurrera egiteko indarra ematen digute" esan du. Bestetik, "gure helburuetako bat dokumentalak egitea denez, monografiko hau dokumental klabean eginda dagoelako". Eta, azkenik, elkarlanean egina izan delako "gure artean, adituekin, eta, batez ere, dokumentalari arima ematen dioten familien aldetik. Beraiei eskertu eta eskaini nahi diegu bereziki sari hau". Baita "Teknopolis-eko lantalde osoari eta Elhuyar Fundazioko kideei" ere.
Zer kontatzen da?
Baina, zer kontatzen da, dokumentalean? Gutxi lagundutako ugalketari buruz hitz egiten da, hasi in vitro ernatzetik eta gaur egungo tekniketaraino. Eboluzioa, tekniken deskribapena, obuluen eta obozitoen hautaketa, manipulazio genetikoa…
"Hemengo zentro publiko zein pribatuetan egiten diren teknikak erakutsi genituen, eta egiten ari diren ikerketak ere bai" diosku Kortabarriak. Horrekin batera, estatu espainiarrean lehen haur-probeta ekarri zuen ikertzailea ere elkarrizketatu zuten, Bartzelonako ikerketa zentroan.
Bi familiaren istorioa
Aurreko guztia alde teknikotik begiratuta, ze bi familien istorioen bidez kontatu zuten hori guztia. Familietako batean, istripu baten ondorioz gurpildun aulkian eta ejakulazio-ezina zuen pertsona baten kasua zuten. Ezkondu eta gero, Gurutzetako ospitalean erabilitako teknikei esker hiru alaba izatea lortu zuten. Beste kasua, mutiko bat izan zuen bikote batena zen. Mutikoak giltzurrunetako gaixotasun bat zuen, genetikoa, herentziazkoa eta sendaezina. Bigarren haur bat ekartzea erabaki zutenean, arazorik ez izateko laborategian neska edukitzeko prozedura egin zuten.