Gazteak
Adin tarteei erreparatuta gazteak dira euskara gehien erabiltzen dutenak, %100ak hain zuzen ere. Hala ere, kontuan hartu behar da neurketa egin zenean oso gazte gutxi zegoela. Baina zeudenek, guztiek egin zuten euskaraz.
Umeak
Hauen atzetik daude haurrak (%81,7). Baina datu kezkagarria da azken urteotan umeen artean euskararen erabilerak behera egin duela. 2001ean %88,7koa baitzen erabilera. Jaitsiera honetan eragina izan du kanpotik euskaraz ez dakiten haurrak herrira etortzeak. Bestalde, ikusi dute umeak elkarrizketako parte direnean erabilera %74,2koa dela eta ez direnean, berriz, %48,5ekoa. Euskaraz hitz egiten dute batez ere haurrek euren artean (%88,6).
Adinekoak
Honetaz gain, aipatzekoa da adinekoetan nabarmen egin duela behera erabilerak. Hauek dira, hain zuzen ere, euskara gutxien erabiltzen dutenak (%44,1).
Antzerako joera beste herrietan
Emaitzak, hala ere, poztekoak dira erabilerari dagokionez. Izan ere, kale neurketak jaso duen erabilera erreala (% 67) espero zitekeen erabilera (% 51) baino altuagoa da. Ibarrean, herri txikietan ere antzerako joera dago; Aretxabaletan eta Eskoriatzan, esaterako. Herri handietan, ordea, alderantzizkoa gertatzen da: Arrasaten eta Bergaran, esperotako erabilera baino baxuagoa da neurketek jasotzen dutena.