Bertsotan egin zuen Aitor Tatiegik domekan San Mames futbol zelaian, Athletic-en eta Realaren arteko derbiaren atsedenaldian. Onintza Enbeita eta biak egin zuten, talde gipuzkoarraren kamiseta jantzita oñatiarrak eta bizkaitarrarena muxikarrak. Bertso-derbian hartu zuten parte biek beste lau bertsolarirekin batera, eta horrelakoetan egiten duten moduan, partidua ikustera joan ziren parte-hartzaileak.
Partidua hasi aurretik, ikurrina atera zuten futbol zelaira Jose Angel Iribarrek eta Iñaxio Kortabarriak, bi taldeetako jokalariek ohorezko pasabidea osatuz. Iribar Athleticeko kapitaina zela eta Kortabarria Realekoa, ikurrina atera zuten biek Atotxan 1976ko abenduaren 5ean, legez kanpokoa zela. Futbol talde bietako klubek orduko ekintza horri omenaldia egin gura izan diete, 50 urtetara San Mamesen aterata.
San Mamesen zeuden bertso-derbiko bertsolariek aukera izan zuten minutu batzuk lehenago Iribirrek eta Kortabarriak ateratako ikurrina berarekin futbol zelaira ateratzeko, eta Aitor Tatiegi eta Onintza Enbeita atera ziren. "Sekulakoa izan da. Ikurrina horrek duen esanahia sekulakoa eta eta eurek eutsitako ikurrina bera neuk ere neure eskuetan izatea... Horrenbeste jende ikustea ere handia izan da. Emozionantea oso", adierazi du Tatiegik.
Realeko hiru eta Athletic-eko beste hiru
Badira urteak talde bien Fundazioek bertso-derbia egitasmoa jarri zutela martxan Bertsolari Elkartearekin batera. Oraingoan Jon Maiak, Onintza Enbeitak eta Txaber Altubek hartu zuten parte Athletic-eko zaleak eta Maddi Aiestaran, Amets Arzallus eta Aitor Tatiegi realzaleak. Zornotzan egin zuten saioa egubakoitzean, eta partidua ikustera joan ziren domekan.