San Migel parrokiako klaustroan dauden kristalak eta paretak garbitzen ibili dira aurreko astean. Goitik behera sokak bota eta arnesei lotuta garbitu dituzte. Klaustroaren barrualdea garbitu dute, baina baita kanpoko paretan ere. Horietan pilatuta zeuden hostoak, belarrak eta harri solteak kendu dituzte, hezetasunari oztopoak jarriz eta eraikina txukunduz.
Klaustrotik pasatzen den errekan ere ibili dira han pilatuta zeuden zuhaitz arrama handiak eta bestelako oztopoak kentzen.
Bizkaiko Gailur Lan Bertikalak izeneko enpresako langileak ibili dira lan hori egiten hiruzpalau egunetan, joan den astean. Berez, joan den neguan parrokia barruan egin zituzten lanen jarraipena izan da lan hau. Orduan lurra berritu zuten eta argiteria aldatu, eta orain klaustroko garbiketa egin dute.
