2018an egin zuen Maialen Lujanbiok lehen aldiz RR emanaldia, eta, geroztik, emanaldiari hainbat moldaketa egiten ibili da. Seigarren bertsioarekin ari da egun lanean, rr_6_ erre(AH)ala izena duena, eta, Aixotu euskara taldearen eskutik, Antixeneko gaztetxera helduko da gaur, 22:00etan. Sarrera arruntek zortzi euroko prezioa izango dute, baina langabeek eta ikasleek hiru eurotan eskuratzeko aukera izango dute.
Hitzak, performance gisa
Emanaldia "hitzen performantzea" bezala deskribatzen du Lujanbiok, eta errezitaldi guztiaren oinarria hitzak eta hizkuntza direla nabarmendu du: "Emanaldiak lengoaia du lehengai". Hala ere, hizkuntzaren elementu hori hainbat euskarriren bidez jorratuko du: "Hitz esanak eta kantatuak, ahozkoak eta idatziak, ikustekoak eta entzutekoak".
Garaiko gaiak jorratu ohi ditu bertsolari hernaniarrak emanaldian zehar, eta bide horretan sortutako soinuek pantaila baten bidez erakutsitako proiekzioak izango ditu lagun. Honela laburbildu du egileak bere emanaldia: "Maialen Lujanbioren eztarritik, errezitaldi poetiko-bertso-performatibo-irakurri ikus-entzutekoa da".