LUX VITAE izena duen bilduma ekainaren 28ra bitartean egongo da ikusgai, asteburuetan: zapatuetan 11:00etatik 13:00etara eta domeketan 11:00etatik 14:00etara; sarrera dohainik da. "Eulateren sormen etapa nagusietan zehar ibilbide berezia proposatzen du, artistaren pintura adierazgarrien sorta bat bilduta, artistaren bizitzari eta espiritualtasunari estuki lotutako testuinguru aproposean haren obra sakonago ulertzeko", azaldu dute antolatzaileek.
Hitzaldia zapatuan
Eulateren lagun Juan Ayesta artistak haren artea ulertzeko hainbat argibide emango ditu bihar, zapatua, komentuan, 10:30ean hasita egingo duen hitzaldian. Interesa duenak aldez aurretik izena eman behar du, adiskideak@arantzazu.org helbidera idatzita edo 688 61 38 40 telefonora deituta.