Ate irekien jardunaldiak egingo dituzte Oñatin dagoen Gipuzkoako Probintziako Artxibo Historikoak eguenean –ekainak 11– eta egubakoitzean –ekainak 12–. Artxiboan zer duten erakusteko bisita bereziak izango dira; funtzionamendua eta artxibo-ondarea herritarrei gerturatzea da helburu. Hala, dutenaren adibide bat erakutsiko dute bisita horietan; esaterako, hor gordeta dauden XV. mendekok zenbait agiri eta inkubable batzuk –1501 aurretik inprimatutako liburuak– erakutsiko dituzte. Baita dokumentuen zaharberritzea nola egiten den ere.
Lau bisita egingo dituzte guztira, bi egun bakoitzean: 11:00etan eta 17:00etan –euskaraz eta gazteleraz bietan–.
Artxiboen nazioarteko eguna ospatzeko antolatu ditu Gipuzkoako Aldundiak ate irekien jardunaldiak. Oñatiko eta Tolosako artxiboetan egingo dituzte, zehazki.