Egubakoitzean hasi zituzten Corpusetako ospakizunak oñatiarrek. Hiru egunez musika eta dantza izan dira protagonista herrian, baina, gaurko Corpus eguna da egun guzti hauetan esanguratsuena. Urteroko gisan, Corpus-prozesioak hartu ditu goizean goizetik herriko kaleak, eta eguraldi ona lagun izanda, herritarrek ez dute hutsik egin ohiko hitzordura.
Goizeko lehen ordutik martxan
Ohiko moldetan heldu da aurten ere Corpus eguna Oñatira, eta goizeko lehen ordutatik martxan izan dira ekintza ezberdinak. Txistulariek izan dute egunari irekiera emateko ardura, goiz-eresiarekin. "9:00etan eman diogu hasiera egunari, goiz-eresia jotzen, eta hemen izango gara eguna bukatu arte", azaldu du Aita Madina txistulari taldeko Lander Diaz de Gereñuk. "Egun berezia izaten da. Guretzat lan handia da, baina urtean zehar prestatutakoak gaur kaleratzen ditugu. Gainera, kanpoan bizi diren txistulariak ere etortzen dira gurekin jotzera, eta guretzat plazer bat da", gaineratu du txistulariak.
Oñatiko Musika Banda da Corpus egunari soinua jartzen dion beste taldeetako bat. Hauek ere goiz-eresia egin dute Oñatiko kaleetan barrena, eta hauek Etxaluzera heltzearekin batera, lehen Santuak irten dira kalera, zehazki, Agerrena etxetik. "Guretzat urteroko zerbait da. Txikitatik ezagutu ditut, eta tradizio moduko bat da. Hemen elkartzen gara, eta ikusten egoten gara. Berezia izaten da", azaldu du Agerrena etxeko Mikel Aberasturik. Aitor Madina du Agerrena etxetik irtetzen diren santuetako bat eramateko ardura. "Esperientzia oso tradizionala da. Urte asko goaz santua eramaten, eta hori da finean, tradizioa", azaldu du. Santu guztiek hartu dute poliki-poliki Parrokiarako bidea, dantzarien laguntzarekin. San Migel izan da azkena irteten. Urteroko legez, udaletxetik irten da, hainbat pertsonaren laguntzarekin, tartean Horazio Argarate parrokoa edo udalbatzako kideak, zehazki, EAJ alderdiko kideak. Irudia parrokiara eltzarekin batera eman diote hasiera mezari.
Prozesioa, egunaren muina
Goraino bete da San Migel parrokia Corpus eguneko meza entzuteko. Dantzariek ere ez dute hutsik egin, eta ohiko erritua jarraituta, bertan izan dira dantzan. Bien bitartean, Santa Ana antzokian eguneko beste une berezi bat eman da. Bertan jantzi dira San Migel, Jesus eta apostolu guztiak, oñatiar askoren begiradapean. "Bi aste lehenago egiten dugu proba orokorra, San Migeli armadura zela geratzen zaion ikusteko. Egunean bertan momentuko estres hori izaten dugu, denbora gutxi izaten dugu eta dena ondo enkajatuta joan behar da. Garrantzitsuena bera eroso egotea da, bi ordu egin behar ditu pisu askorekin, eta kalean eroso egon beha da", azaldu du Kofradiako kide Mirari Zilaurrek.
12:00etan eman diote hasiera prozesioari. Ohi bezala, Kofradiako kideek gidatu dute, eta musika bandak, txistulariek, dantzariek, santuen irudiek, hamabi apostoluek, Jesusek, abadeek udalbatzako kideek eta parrokiako gainerako laguntzaileek egin dute plazarainoko bidea. Txiki eta estu gelditu dira Oñatiko kaleak, prozesioa ikustera hurbildu diren herritarren eraginez.
Plazako ekitaldiarekin eman diote amaiera prozesioari. Santuen irudiek beraien lekua hartu ostean, eliz-pertsonek San Migeli eskeinitako aldarea gurtu dute. Dantzariek ere izan dute tartea dantza egin eta aldarea gurtzeko. Nola ez, San Migelek bere ohiko erreberentzia ere egin du, lepo betetako plazaren aurrean.
Goizak utzitakoarekin pozik gelditu dira protagonista guztiak. "Ondo joan dela esango nuke. Zuzeneko lana da, eta bakoitzak bere paperetik ahal duena egiten du. Eguraldi ona egin du, ez du euririk egin, hori da beti eskatzen duguna, eta beroa ere ez da gehiegizkoa izan. Ondo egon da, beti egoten dira desfase batzuk, baina hori normala da, beraz nik ondo ikusi dut", azaldu du Kofrdiako kide Josu Amondarainek. Dantzarien kapitain lanetan ibili den Ane Irazabal ere pozik agertu da: "Uste dut orokorrean ondo joan dela. Bero egiten zuen, baina, ondo joan delakoan nago. Gustura gelditu gara guztiak, beraz pozik gaude".
Partaide berriak
Prozesioaren formak ohikoak izan diren arren, urtetik urtera partaide berriak gehitzen zaizkio. Kepa Urrestarazu, esaterako, lehenengoz izan da aurten San Migel bezala. Hunkituta agertu da prozesioaren ostean: Oso polita izan da, oso hunkigarria. Lehen aldia izan da niretzat, eta oso esperientzia polita izan da". Ruben Vaz izan du bidelagun Urrestarazuk, Jesus bezala. Honentzat ere lehen aldia izan da, eta pozik agertu da emaitzarekin: "Polita izan da, eta oso gomendagarria. Denon artean ondo irten da. Herria pozik dago, eta gu ere bai".
Dantzarien artean ere aurpegi berriak ikusi dira. Lau dantzarik izan dute prozesioan lehenengoz irteteko aukera: Ane Pelayo, Xabier Agirre, Julen Agirre eta Unai Izura. "Esperientzia ederra izan da, bero asko egin du, baina asko disfrutatu dugu", azaldu du Izurak.
Astelehenean, sakonean
Korpusen inguruko erreposteajea emitituko du Goiena telebistak bihar, astelehena, 2:30ak aldera. Bertan, Corpus eguna eta Corpus-prozesioa barrutik ezagutzeko aukera egongo da. Ondoren, goiena.eus atarian nahieran ikusteko aukera egongo da.