Ertzaintzak atzo, apirilak 19, 19:30ak aldera jaso zuen Oñatiko taberna bateko arduradunaren deia esanez lapurtzen saiatu zirela pistola batekin mehatxatuta. Deba-Urolako ertzain etxeko patruilak bertaratu ziren eta tabernako zerbitzariak azaldu zien lokalaren kanpoaldean izan zela gertaera, telefonoz hizketan ari zenean. Horrek azaldu zuenez pertsona bat hurbildu zitzaion kalean eta telefono mugikorra emateko esan zion. Bi aldiz ezetz esandakoan, gizonak gerrian zeraman pistola erakutsi zion. Hori ikusita korrika alde egin zuen eta kalean zihoan pertsona bati laguntza eskatu zion.
Ertzaintzatik prentsa-ohar bidez adierazi dutenez gertaera lekutik gertu topatu zuten gizonaren deskribapen fisikoarekin bat zetorren pertsona bat, eta egiaztatu zuten pistola bat zeramala ezkutatuta. Airsoft arma simulatu bat zen eta konfiskatu egin zioten.
Atxilotu egin zuten gizonezko hori beldurra eraginez lapurtzen saiatzeagatik, eta ertzaintzaren esanetan "patruilarekiko jarrera asaldatua eta oldarkorra" erakutsi zuen une horretan. Atxilotua epailearen eskuetan jarriko dute dagozkion eginbideak amaitu ondoren.
Domeka goizaldean liskarra