Apirilaren 2an hasi zituzten jardunaldiak, baina euriaren ondorioz, ezin izan zen lehen taldea aurreikusitako moduan goiz horretan sartu. Eguraldia hobetu zenean, egubakoitz goizean, ekin zioten lanari.
Lehen taldea goizeko 10:00etan sartu zen kobara, eta 15:00etarako komunikazioa egitea aurreikusia zuten. Ordu hori iritsita, ordea, ez zuten lortu harremanik ezartzea, eta "kezka" piztu zen kanpoan. Joseba Dorado Euskal Espeleologia Elkargoko presidente eta Aloña Mendiko kideak azaldu duenez, komunikazio arazoen atzean uraren eragina egon zitekeela pentsatu zuten, izan ere, komunikazio puntuen azpitik erreka handia igarotzen da, eta horrek aparatuen funtzionamendua oztopatu dezake. Komunikatzeko aparatua apurtu edo busti zitekeela ere ondorioztatu zuten. ![](https://goiena.eus/<a href="/argazkia/550064"><img src="https:/goiena.tok-md.com/argazkiak/KnT/cache/WhatsApp_Image_2026-04-04_at_12.52.33_tokikom_700x700.jpeg"></a>)
Egoera ikusita, bigarren taldea beste komunikatzeko gailu batekin sartu zen arratsaldeko 18:00etan. Haiekin 23:00etan hitz egiteko asmoa zuten, izan ere, kalkuluen arabera, bost ordu behar dituzte kobaren barruan 416 metroko sakoneran ezarritako bibaketara iristeko. Hauekin ere, ez zuten komunikazioa zuzenean lortzerik izan. Doradok azaldu du, soinuen bidez komunikatzea lortu zutela: “Guk esaten genien ondo bazaudete, bi soinu egin”. Horrela, atzo gauean baieztatu zuten barruan zeuden zortzi kideak ondo zeudela. Gaur goizean, komunikazio puntua gorago kokatuta, lortu dute harreman zuzena ezartzea barruan daudenekin.
. 
Sifoiaren aurrean, beste bideen bila
Komunikazioaren bidez jakin dutenaren arabera, bi kobak elkartzeko esplorazio lanek aurrera jarraitzen dute. Dena den, bost metroko putzu bat eta erreka bat gainditu ondoren, sifoi batekin topo egin dute, eta hori gainditzeko urpekaritza beharko litzateke. Beste bide batzuk bilatzeko, bi eskalada egin dituzte, baina oraingoz ez dute lotura lortzeko biderik baieztatu.
Ez da lehen aldia antzeko oztopo batekin topo egiten dutena: duela lau edo bost urte ere sifoi batek geldiarazi zuen aurrerapena. Halakoetan, azaldu du Doradok, atzera egin eta beste pasabide batzuk bilatzen saiatzen dira, oztopoa goitik gainditzeko.