50. urteurreneko ospakizunetan murgilduta jarraitzen du Aloña Mendi taldeko eskubaloi sailak. Apirilaren 10ean izango da hurrengo hitzordua, Zubikoako kiroldegian. Bi partida jokatuko dira egun horretan: alde batetik, Argentinako eta Erresuma Batuko selekzioen arteko norgehiagoka; eta, bestetik, Super Amara Bera Berak eta Zuazok jokatuko duten Euskal Kopako finala. Partida bakoitza ikusteko 5 euro ordaindu beharko da, eta sarrerak salgai daude Aloña tabernan.
Bi selekzio Zubikoan
Ez da ohikoena Zubikoan goi-mailako bi selekzio jokatzen ikustea, baina, 50. urteurrenak ahalbideratu du hori. Basque Country International Womens Cup txapelketa jokatuko dute, apirilean, euskal selekzioak, Argentinak eta Erresuma Batuak, eta, Aloña Mendiren eskubaloi saileko presidente Iñaki Mendarozketak azaldu duenez, Federazioak proposatu zien partida hau herrira ekartzea: "Euskadiko Eskubaloi Federazioak partida hori Zubikoara ekartzeko aukera eman zigun, eta baiezkoa eman genuen, apirilaren 10eko eguna borobiltzeko aukera polita zelako".
Partida polita aurreikus daiteke, Mendarozketaren arabera, Argentina Hego Amerikako selekzio indartsuetako bat da eta: "Eskubaloian, selekzio indartsuenak Europan daude, baina Argentina Hego Amerikako selekzio potenteenetako bat da". Erresuma Batua, berriz, itzalpean egon den selekzio bat da, baina indarra hartu nahian dabilena: "Etorkizunera begira dabilen selekzio bat da. Orain arte, nahiko maila eskasa izan dute, baina egoera hori aldatu egin nahi dute".
Euskal Herriko onena
Munduari begiratu ostean, Euskal Herriak eskaintzeko duen onena jasoko du Zubikoak, Emakumezkoen Euskadiko Eskubaloi Koparekin. Super Amara Bera Bera eta Zuazo taldeak izango dira aurrez aurre. Gaur egun maila ezberdinetan jokatzen duten arren, partida ikusgarria izango delakoan dago presidentea: "Bera Bera goiko mailan dago, eta Zuazo, bat beherago. Maila ezberdinetan jokatzen duten arren, ikusteko partida ederra izango da". Euskadiko Kopa gehien irabazi dituzten bi taldeak dira Bera Bera (12) eta Zuazo (2), eta bi taldeetako batek ere ez du amorerik eman nahiko partida horretan.
Eskubaloia, osasuntsu
Mendarozketaren ustez, Oñatiko eskubaloia osasuntsu dagoela erakutsi du urteurrenak: "Eskubaloia Oñatin ondo errotutako kirola da, eta 50. urteurren honetan argi ikusi da hori. Jendeak ondo erantzun du, eta, bestela ere, asteburuetan Zubikoa bete egiten da; bereziki, senior taldeen partidak ikusteko".
Osasun horren erakusle da atzean egiten den lan guztia. 240 jokalari inguru daude sailean, hamabost taldetan banatuta, eta haiekin 30 entrenatzaile. Eskubaloi eskolan, berriz, 116 gazte eta zazpi entrenatzaile dira.
Senior neskak, igoerako 'play-off'-etan
Denboraldi hasieran, liga berrirako helburuengatik galdetzean, hauxe erantzun zion Construcciones Ugarte Aloña Mendiko entrenatzaile Pablo Garciak GOIENAri: "Maila mantentzea bai, baina aurtengo helburu nagusia formakuntzan sakontzea eta lehiatzea dira". Taldeak ondo egin ditu lanak, eta, mailari eustearekin konformatu gabe, igoerako play-off-etarako sailkatu dira. Entrenatzaileak dio helburuak bete direla eta horrela jarraitu nahi dutela: "Bide beretik jarraituz gabiltza aurrerapauso handiak eginez. Formakuntza aurrera doa eta lehiatzen ikasten gabiltza. Helburuak, bide batez, ezin hobeto betetzen gabiltza".
Ilusioa eta erronka
Ilusioa dutela aitortu du Garciak, baina badaki erronka handia dela: "Ilusioz beteriko erroka dugu aurrean; ezin dugu ahaztu aurkarien maila handia. Hasieran pentsatzen genuena baino erronka handiagoen aurrean gaude, eta bidea egiten gabiltza horiek ahalik eta ondoen gainditzeko". 50. urteurrena "ahaztezina" izango dela gaineratu du, eta "maila onena" emateko bidean direla.
