Martxoaren 31 Koloneko Minbiziaren Aurkako Nazioarteko Eguna da, eta, horren harira, topaketa mediko-gastronomikoa egin zuten eguazten arratsaldean Oñatiko nekazaritza-elkartean. Ekimena Minbiziaren Aurka Gipuzkoan elkarteak antolatu zuen, eta prebentzioa eta detekzio goiztiarra izan ziren ardatz nagusiak. Hitzaldiaren gidaritza Ainhoa Barrenak hartu zuen, elkarteko psikologoak. Azaldu zuenez, koloneko minbizia da gaur egun intzidentzia handienetakoa duenetako bat, eta, nahiz eta sarritan gizonezkoekin soilik lotu, emakumeek ere izaten dute.
Detekzio goiztiarra
Detekzio goiztiarraren garrantziaz aritu zen, bereziki, Barrena, eta probak egiteko dei egin zuen. Programa 2009an jarri zen martxan, eta ordutik aurrerapauso handiak eman dira: gaur egun, %71ko parte-hartzea du Euskal Autonomia Erkidegoan. Hala ere, oraindik badago proba egiteko beldurra edo errezeloa duen jendea. Horregatik, informazioa zabaltzea eta kontzientzia piztea dute helburu elkartean; izan ere, datuak argiak dira: koloneko minbizia garaiz detektatuz gero, hamar pertsonatik bederatzik biziraun dezakete. Gainera, proba erraza eta eskuragarria dela azpimarratu zuen: etxean bertan egin daiteke, eta Osakidetzak bi urtez behin bidaltzen du, doan. "Zure etxetik salba dezakezu zure bizitza", adierazi zuen psikologoak.
Arrisku-faktoreak
Arrisku-faktoreen artean daude adina, gehiegizko pisua, sedentarismoa eta alkoholaren eta tabakoaren kontsumoa, baita zigarro elektronikena ere. Elkarteak argi du mezua: ez dute beldurra zabaldu nahi, baizik eta herritarren esku dagoenari balioa eman eta ohitura osasungarriak sustatu. Eguazteneko topaketak ikuspegi praktikoa ere izan zuen, Iñaki Olaldek menu osasuntsu bat prestatu baitzuen, elikaduraren garrantzia azpimarratzeko.
Arrasaten egoitza berria
Debagoienean bere txokoa izango du etorkizunean Minbiziaren Aurka elkarteak; izan ere, ekainean bertan egoitza berria irekitzea espero dute. Helburua bailaran presentzia handiagoa izatea da, eta herritarrei gertutik zerbitzua eskaintzea. Elkarteak herritarren eskura jarruko dituen doako zerbitzuak honakoak dira: arreta psikologikoa, haur eta gazteen psikologia, gizarte-laguntza, ariketa fisikoa, erizaintza, nutrizioa, fisioterapia, tabakoa uzteko programak eta boluntariotza, besteak beste.